Y GIG - lle gwerth chweil i weithio

Y Gwasanaeth Iechyd Gwladol (GIG) yw un o'r cyflogwyr mwyaf yn y byd, a'r mwyaf yn Ewrop, gyda thros 1.3 miliwn o staff.

Dyma ddiwrnod nodweddiadol i'r GIG:

• dros 835,000 o bobl yn ymweld â phractis eu meddyg teulu neu nyrs practis
• bron i 50,000 o bobl yn ymweld ag adrannau damweiniau ac achosion brys
• 49,000 ymgynghoriad cleifion allanol
• 94,000 o bobl yn cael eu derbyn i'r ysbyty fel achos brys
• 36,000 o bobl yn yr ysbyty am driniaeth wedi'i chynllunio.

Mae'r GIG yn cynnig amrywiaeth enfawr o gyfleoedd cyffrous a heriol i bobl sydd eisiau gwneud gwahaniaeth o ddifrif. Gyda thros 300 o yrfaoedd gwahanol ar gael, mae yna swydd i chi beth bynnag yw eich diddordebau, sgiliau neu gymwysterau.

Ni waeth pa faes yn y GIG y byddwch yn ymuno ag ef, byddwch yn dod yn rhan o dîm dawnus, brwdfrydig o bobl - sy'n ymroi i roi'r gofal a'r driniaeth orau i gleifion. Byddwch hefyd yn mwynhau un o'r pecynnau buddion mwyaf cystadleuol a hyblyg i gael eu cynnig gan unrhyw gyflogwr yn y Deyrnas Unedig.

Tâl ac amodau

Mae sicrwydd y bydd pawb sy'n ymuno â'r GIG yn derbyn cyflog sy'n cyfateb i'w gallu a'u cyfrifoldebau, ac yn cael pob cyfle i'w gynyddu trwy hyfforddiant a datblygiad.

Mae system dâl y GIG, a elwir yn Agenda ar gyfer Newid (AfC), yn gymwys i bob aelod o staff heblaw meddygon, deintyddion, a rheolwyr uchel iawn. Mae'r buddion yn cynnwys:

• wythnos waith safonol o 37.5 awr
• ychwanegiadau tâl i dalu am waith y tu allan i oriau arferol, sifftiau a goramser
• hawl i 27 diwrnod o wyliau y flwyddyn, ynghyd ag wyth diwrnod o wyliau cyffredinol a chyhoeddus. Bydd hyn yn codi i 33 diwrnod ar ôl 10 mlynedd o wasanaeth
• gwell cynnydd o ran gyrfa a thâl ar sail cymhwyso gwybodaeth a sgiliau
• adolygiadau datblygiad personol blynyddol i gefnogi dyheadau gyrfa.

Eich helpu i ddod o hyd i'r cydbwysedd iawn rhwng gwaith a bywyd

Mae'r GIG yn cydnabod pwysigrwydd cael cydbwysedd iach rhwng gwaith a bywyd. Cafodd menter Gwella Bywydau Gwaith (IWL) ei chyflwyno yn 2000, ac y mae wedi helpu i greu newid go iawn yn niwylliant y GIG - gan ostwng pwysau, cynyddu cymhelliad, a gwella cynhyrchiant ymysg staff. Mae gweithio hyblyg yn golygu bod:

• swyddi rhan amser a chyfleoedd i rannu swyddi ar gael yn aml, yn ogystal â swyddi adeg y tymor yn unig, fin nos a'r penwythnos
• gall y GIG helpu gyda gofal plant hefyd, gan gynnwys gofal meithrinfa, clybiau ar ôl ysgol a gofal brys
• os ydych yn astudio ar gyfer cymhwyster, yn magu teulu, neu'n ymdopi â chyfrifoldebau eraill, byddwn yn gwneud popeth o fewn ein gallu i gyfuno'r ymrwymiadau hyn gyda'ch gwaith
• bydd llawer o bobl yn y GIG yn cymryd toriad estynedig i ofalu am blant iau neu bobl ddibynnol eraill sydd angen gofal arbennig
• byddwch yn cael mynediad at wasanaethau iechyd galwedigaethol hefyd, fel cynghori.

Cyflawnwch eich potensial

Mae'r GIG yn ymrwymo i gynnig cyfleoedd dysgu a datblygu i bob gweithiwr llawn amser a rhan amser. Does dim gwahaniaeth ble'r ydych yn dechrau o fewn y GIG, byddwch yn cael mynediad at hyfforddiant ychwanegol a chael pob cyfle i symud ymlaen o fewn y sefydliad.

Byddwch yn cael adolygiad personol bob blwyddyn a chynllun datblygu i gefnogi cynnydd eich gyrfa, a byddwch yn cael eich annog i symud ymlaen trwy'r Fframwaith Sgiliau a Gwybodaeth.

Ymunwch ag un o gynlluniau pensiwn gorau y Deyrnas Unedig

Cynllun Pensiwn y GIG yw un o'r rhai mwyaf hael a chynhwysfawr yn y Deyrnas Unedig. Bydd pob gweithiwr newydd yn dod yn aelod yn awtomatig a byddwch yn cael pecyn ardderchog o fuddion pensiwn, wedi'i ddiogelu'n llawn rhag chwyddiant a'i warantu gan y llywodraeth. Edrychwch ar www.nhsbsa.nhs.uk/pensions i gael gwybod mwy am delerau ac amodau.

I gael gwybod mwy am weithio yn y GIG, y llwybrau gyrfa sydd ar gael a mwy am lwybrau mynediad, ewch i wefan NHS Careers.

Rhagor o Ddolenni

NHS Jobs © Copyright 2009